Tornade Spectrale
Tornade Spectrale, una vertadièra tronadissa ! Laureat del dispositiu Jazz Migration 2026, lo duò s’apodera del son brut dins un concèrt immersiu onte lo rāga indostaní e los cants tradicionals traucan la barrièra del son.
Format a Tolosa en 2024, Tornade Spectrale recampa Sam Brault e Claire Lenoël. L’un es afogat de Terry Riley, figura del minimalisme american ; l’autra a estudiat la flauta bansuri amb lo mèstre indian Hariprasad Chaurasia… Sus la meteissa frequéncia, lo duò parteja un gost plan marcat per las musicas fondadas sul dròne, la repeticion e los mòdes, per lo DIY e l’improvisacion.
Amb Tornade Spectrale, lo rāga indostaní e los cants tradicionals traucan la barrièra del son, portats per un contunh de texturas enfachinantas e una gramatica sonora que navega entre drone, noise e ambient.
Sens cap de retenguda, lo repertòri de Tornade Spectrale fa se rescontrar un cant de Naut Agenés e una mescla noise a la manièra de Méryll Ampe, lo tranc elementari del rāga e una represa en occitan de Massive Attack. Sens comptar las voses sortidas d’enregistraments sonòrs d’archius e del ventre de las maquinas, que ressonan coma de preséncias subrenaturalas — Laurie Anderson, sètz aquí ?
Lo metòd es artesanal, mas la resulta es espectaclosa : aquí, un claxon de camion se pren per un tanpura indian ; aval, lo sintetizador modular canta amb lo bansuri e lo banjo per téisser de boclas sonòras, mentre que las lengas semenan d’istòrias d’aucèls, de montanhas e de brugas.
En escafant las frontièras, Tornade Spectrale s’apodera del son brut e ven engrossir las rengadas d’una novèla generacion d’explorators/itz sonòrs, prigondament ancorats dins lor territòri, coma los collectius Hart Brut, La Nòvia e La Crue. Aprèp la sortida de lor EP A l’aube tempétueuse, la brume s’illumine en 2026, lo duò es estat designat laureat de Jazz Migration : una vertadièra tronadissa signada Tornade Spectrale !
per Jeanne Lacaille, France Musique
Sam Brault : òrgue, sintetizadors, votz
Claire Lenoël : sintetizador, flautas, banjo, votz
